Iskat ja molsut máná lihpara dárbbu mielde.
Ii leat buorre jus lea beare báhkas dahje beare galmmas. Mánáid dábálaš rumaštemperatuvra lea gaskal 36 ja 37,5 gráda. Jus mánás lea 38 gráda dahje eanet, de dat adno leame feberin. Dovdda gieđain áinnas máná niskki. Jus leat eahpádusas, mihtit febermihttáriin temperatuvrra.
Máná rumaštemperatuvrra mihtida eanemus riekta bahtačoalis termomehteriin. Jus vuollel 3 mánnosaš mánás lea temperatuvra vuollel 36 gráda dahje badjel 38 gráda, de galgá jođánit váldit oktavuođa doaktáriin vai son árvvoštallá dili.
Mánná dárbbaša du vai dovdá iežas oadjebassan. Jus mánná ii sáhte oaidnit dahje dovdat du, de son ii ipmir don leat lahkosis.
Mánát čirrot dávjá go leat váibasat, huššaluvvan dahje badjelmeare stimulerejuvvon. Mánát leat iešguđetláganat, muhto buohkat dárbbašit ollu oađđit ja vuoiŋŋastit. Aiddoriegádan mánná dárbbaša gaskamearálaččat oađđit gaskal 13 ja 17 diimmu jándoris. Sii dábálaččat váibet go leat gohcán 1-2 diimmu. Ii leat fasihtta movt máná galgá oažžut jaskkodit dahje nohkat. Muhtumat gurpet máná, muhtumat bidjet máná mánnávovdnii ja vázzet tuvrra dahje biilii ja vudjet tuvrra, eará mánát jaskkodit dopmonoavkki, golgi čázi jienain dahje oadjebas ollesolbmuin gii dadjá shhhh ja vuhtoda máná.
Iskka leago mánás unohisvuohta. Iskka temperatuvrra, čavgá go lihpar dahje čavget go biktasat, iskka sáhttá go vuoktačalbmi čavgan suorpmaid, juolgesuorpmaid dahje cissá birra. Jus mánná čierru eahpedábálaš ollu, dahje don balat son čierru buozalmasvuođa dahje vaháguvvama geažil, de váldde oktavuođa doaktáriin.